Mu ijoro rya Noheri tariki 25 Ukuboza 2021, mu Ntara y’Iburasirazuba hafashwe abantu 802 barenze ku mabwiriza atandukanye yo kwirinda COVID-19.
Umuvugizi wa Polisi y’Igihugu mu Ntara y’Iburasirazuba, CIP Hamdoun Twizeyimana, avuga ko muri aba bafashwe harimo 59 bafatiwe mu tubari barenzengeje amasaha, uretse ko ngo hari n’abacitse abagenzuraga iyubahirizwa ry’amabwiriza.
Hari kandi 361 bafashwe batambaye agapfukamunwa, 218 barengeje amasaha yo kuba bageze mu ngo zabo, 164 bazira kudahana intera, hafashwe kandi moto ebyiri n’amagare atatu.
Abantu 243 ni bo baciwe amande angana na 789,000Frs.
CIP Hamdoun Twizeyimana avuga ko muri iyi minsi mikuru abantu barimo gutegura ibirori mu ngo zabo kandi bitemewe.
Yibukije abaturage ko bafite uburenganzira bwo kwishimisha mu ngo zabo n’imiryango yabo badatumiye inshuti n’imiryango, kandi bubahiriza amabwiriza yo kurwanya Covid-19.
Yagize ati “Tuributsa abantu ko muri ibi bihe by’iminsi mikuru buri muntu yumve ko afite inshingano zo kubahiriza amabwiriza yo kwirinda ikwirakwira rya Covid-19.”
Yakomeje agira ati “Tuributsa abantu ko Polisi idahugiye gusa mu kugenzura iyubahirizwa ry’amabwiriza yo kurwanya Covid-19, ko ahubwo inari mu bikorwa byo kurwanya ibyaha bisanzwe.”
Yasabye abaturage gukomeza ubufatanye na Polisi mu kurwanya ibyaha n’abarenga ku mabwiriza yo gukumira Covid-19 batanga amakuru ku gihe.
Kayitesi Ange
